posted Feb 14, 2010 3:15 AM by Elshad Nuriyev
Bakı. Aynur Vəliyeva - APA-Economics. Azərbaycanda “GoldenPay” onlayn ödəmə sisteminə artıq 35-dən çox şirkət qoşulub.
Azərbaycan Rabitə və İnformasiya Texnologiyaları Nazirliyi mətbuat xidmətinin rəhbəri Müşfiq Əmirovun «APA-Economics»ə verdiyi məlumata görə, bir müddət öncə bu sistemdən artıq Bakı Telefon Rabitəsi İstehsalat Birliyinin telefon abunəçiləri də istifadə etmək imkanı əldə ediblər.
Yaxın gələcəkdə bu xidmət vasitəsilə artıq Azərbaycanın istənilən nöqtəsində yaşayan vətəndaşlar da telefon abunə və şəhərlərarası danışıq haqlarını internet üzərindən ödəyə biləcəklər. Bu xidmətin Azərbaycanda ilk dəfə tətbiqinə “SiverKey Azərbaycan” şirkəti başlayıb. “Aztelekom” İB-nin dəstəyi ilə Tələbə Qəbulu üzrə Dövlət Komissiyası (TQDK) da oxşar sistemlə abituriyentlərə xidmət göstərir. TQDK-dakı ödəmə kartları artıq elektron ödəmə kartları ilə əvəzlənib.
Qeyd edək ki, hazırda “Azerfon”, “Azercell”, “Bakcell”, “Bestkomp”, “NLT Telekom”, “NLİNK”, “NEXUS”, “Adanet” və s. şirkətlər müştərilərinə internet vasitəsilə balans yükləmək, kompüter avadanlığı almaq imkanını təqdim edir.
Yerli ekspertlərin rəyinə görə, yaxın 3-4 il ərzində Azərbaycanda elektron ticarət yüksək səviyyədə inkişaf edəcək və bu sahədə böyük uğurlar qazanılacaq.
12/02/2010 |
posted Feb 12, 2010 5:39 AM by Elshad Nuriyev
[
updated Feb 14, 2010 3:18 AM
]
Bakı. Elnur Hüseynquluyev – APA-Economics. «Royal Bank» ASC-nin aktivlərinin həcmi 2010-cu ilin yanvar ayının 1-nə 144,606 mln. manat təşkil edib ki, bu da ötən ilin əvvəli ilə müqayisədə 42% çoxdur.
Bankın baş ofisindən «APA-Economics»ə verilən məlumata görə, hesabat ilində bankın depozit portfeli 76,7% genişlənərək 63,746 mln. manata, kredit portfeli 31,5% artaraq 103,598 mln. manata, o cümlədən istehlak kreditlərinin həcmi 30,4% artaraq 86,243 mln. manata çatıb. Həmçinin, bu müddət ərzində bankın məcmu kapitalı 18,8% artaraq 21,215 mln. manat, o cümlədən nizamnamə kapitalı 21,9% artaraq 20,622 mln. manat təşkil edib.
Qeyd edək ki, son bir il ərzində bankın gəlirləri 45,7% artaraq 25,242 mln. manat, xərcləri isə 49% artaraq 25,713 mln. manat olub. Nəticədə, bank ötən ili 471 min manat zərərlə başa vurub.
Xatırladaq ki, bu müddət ərzində bank əlavə 3 filial açıb, 4 bankomat və 28 POS-terminal quraşdırıb. Eyni zamanda, bankın müştərilərinin sayı 30,2% artaraq 45 216 şəxs, işçilərinin sayı 17% artaraq 594 nəfər, orta aylıq əmək haqqı isə 39,3% artaraq 574 manat olub.
Əsas təsisçisi ABŞ vətəndaşı olan «Royal Bank» SKB 1993-cü ildə Azərbaycanda «OZ Bank» kimi yaradılıb. Bankın ölkə üzrə 31 filialı, 8 mübadilə məntəqəsi, 31 bankomatı və 104 POS-terminalı fəaliyyət göstərir.08/02/2010 |
|
